បន្ទាយមានជ័យ៖ បន្ទាប់ពីបិទសាលារៀនអស់ជាង៧ខែដោយសារបញ្ហានៃជំងឺកូវីដ-១៩ នៅថ្ងៃទី១ ខែវិច្ឆិកានេះ សាលារៀនទាំងអស់ទូទាំងប្រទេសត្រូវបានបើកឱ្យដំណើរការឡើងវិញដែលជាឱកាសឲ្យពួកគេបានបន្តការសិក្សារៀនសូត្រឡើងវិញជាមួយនឹងលោកគ្រូអ្នកគ្រូ ក្រោយពីសាលាត្រូវបានបិទមួយរយៈធំដោយសារតែការផ្ទុះរាតត្បាតនៃជំងឺកូវីដ-១៩។

សិស្សានុសិស្សនៃវិទ្យាល័យសិរីសោភ័ណបង្ហាញសេចក្ដីសប្បាយរីករាយដែលបានវិលត្រលប់មកចូលរៀនវិញនាពេលនេះ។ ពួកគេលើកឡើងថា ការសិក្សាតាមប្រព័ន្ធអនឡាញកន្លងទៅធ្វើឱ្យពួកគេជួបបញ្ហាជាច្រើន ដូចជាគ្មានលទ្ធភាពទិញកុំព្យូទ័រ ឬទូរស័ព្ទប្រើប្រាស់ដើម្បីរៀនសូត្រដូចគេ ពេលខ្លះជួបបញ្ហាប្រព័ន្ធអ៊ិនធើណែត។

ប្រធានមន្ទីរអប់រំ យុវជន និងកីឡា ខេត្តបន្ទាយមានជ័យលោក ឈូ ប៊ុនរឿង បានឱ្យEAC News ដឹងថាមុនដំណើរការបើកសាលារៀនឡើងវិញនេះសាលាទាំងអស់ត្រូវមានការរៀបចំសម្អាតបរិស្ថាន រៀបចំកន្លែងលាងសម្អាតដៃ ដាក់ឧបករណ៍វាស់កម្តៅ ឡាបូលាងសម្អាតដៃ និងសម្ភារៈផ្សេងៗជាច្រើនទៀតតាមសាលាទូទាំងខេត្តសរុប៥១២សាលា។ ទោះជាយ៉ាងណាមានតែសាលាប្រមាណ ៤១២សាលាប៉ុណ្ណោះដែលបានបើក ខណៈសាលាផ្សេងទៀតត្រូវនៅធ្វើជាមណ្ឌលចត្តាឡីស័ក និងរងគ្រោះពីទឹកជំនន់នៅឡើយ។

លោកប្រធានមន្ទីរក៏បានបញ្ជាក់ផងដែរថា ចាប់តាំងពីផ្ទុះការឆ្លងរាលដាលជំងឺកូវីដ-១៩មក មានបុគ្គលិកអប់រំជាង៦០០នាក់ បានរកឃើញវិជ្ជមានកូវីដ-១៩ ហើយទទួលបានការព្យាលបាលជាសះស្បើយហើយដែរ។ លោកបញ្ជាក់បន្ថែមថា បើក្នុងករណីនៃដំណើរការបើកសាលារៀនឡើងវិញនេះ មានសិស្សានុសិស្សណាមានវិជ្ជមានកូវីដ-១៩ ទាំងសាលារដ្ឋនិងសាលាឯកជនគឺមិនមានការបិទសាលានោះទេពោលសិស្សដែលមានវិជ្ជមានរៀននៅថ្នាក់រៀនណាត្រូវបិទថ្នាក់រៀននោះមួយរយៈសិន។

ក្រសួងអប់រំ យុវជន និងកីឡាបានសម្រេចចាប់បើកដំណើរការគ្រឹះស្ថានសិក្សាចាប់ពីថ្ងៃទី១ ខែវិច្ឆិកា ឆ្នាំ២០២១នេះគ្រប់កម្រិតសិក្សាទាំងរដ្ឋនិងឯកជនទូទាំងរាជធានី-ខេត្ត ។ ការបើកដំណើការគ្រឹះស្ថានសិក្សាចំណេះដឹងទូទៅឡើងវិញនេះអនុញ្ញាតឱ្យ បង្រៀនតាមបណ្តុំពី១៥ទៅ២០នាក់ និងឆ្លាស់វេនគ្នាដោយបន្តអនុវត្តនូវគម្លាតសុវត្ថិភាពនិងវិធានការសុខាភិបាលចាំបាច់នានា។ នៅក្នុងសាលាមិនអនុញ្ញាតឱ្យមានការលក់ដូរចំណី ឬអាហារនិងសកម្មភាពហាត់កីឡានោះទេ៕